Yunanıstanın “Eurovision-2008"dəki təmsilçisi Kalomira srağagün Azərbaycana gəlib. Bu barədə bizə ”Eurovision"un Azərbaycandakı təşkilat komitəsinin üzvü Samir Pənahov məlumat verdi. O bildirdi ki, Afina təmsiçlsi İTV-də yayımlanan bir neçə proqramda qonaq olub. S.Pənahov dedi ki, İTV “Eurovision” müsabiqəsinin təşkilindən sonra Avropa ölkələrinin ictimai televiziyaları ilə əlaqə saxlayaraq, beynəlxalq müsabiqə iştirakçılarının təbliğ olunması layihəsinə qoşulub.
“Biz ilk dəfədir ki, bu promotora qoşuluruq. Bu, qarşılıqlı layihədir. Azərbaycanı ”Eurovision"da təmsil edən ifaçılarımız da Avropa turnesində iştirak edirlər".
Fürsətdən istifadə edib əcnəbi müğənnilə söhbət etdik.
Azərbaycanda ilk dəfə olduğunu bildirən müğənni buna qədər ölkəmiz haqda internet saytlarından məlumat əldə etdiyini dedi. Onun sözlərinə görə, Bakıya gəldikdən sonra paytaxtımıza heyran olub: “Mən bilmirdim ki, Azərbaycanda insanlar bu qədər mehriban, ünsiyyətcil və qonaqpərvərdir. Bakıdan xoşum gəldi, gözəl şəhərdir. Çox güman ki, Azərbaycana yenə də gələcəm, növbəti dəfə geniş konsert proqramı ilə çıxış etmək arzusundayam”.
Müğənni özü haqda bunları dedi: “1985-ci ildə Nyu Yorkda doğulmuşam. Anam və atam yunandırlar, hər il yayda Yunanıstanda oluruq. Musiqini uşaqlıqdan sevirəm, hətta 2 yaşımdan mahnılar oxuyurdum. Professional kaman ifaçısıyam.
2002-ci ildə Yunanıstanda keçirilən mahnı müsabiqələrindən birində iştirak etdim və qalib oldum. O vaxtdan Yunanıstanda yaşayıram. Müğənniliklə bərabər Yunanıstanda seriallara da çəkilirəm. Bu il “Eurovision”da iştiraka dəvət edildim və 60 faiz səs çoxluğu ilə qalib oldum. Azərbaycan promotor çərçivəsində səfər etdiyim ilk ölkədir. Buradan sonra Rumıniyaya gedəcəm".
Azərbaycanı “Eurovision”da təmsil edən ifaçılarımıza gəlincə, Kalomira onların ifa tərzini və şou göstərmək qabiliyyətlərini çox bəyəndiyini dedi: “Elnur və Samirlə Yunanıstanda yaxından tanışlığım mümkün olmamışdı. Sizin İctimai Televiziyada ”Eurovisionnews" verilişində birlikdə iştirak etdik. Onlarla yaxından tanış olduq. İfalarını çox bəyəndim. Onların çox gözəl səsləri və şou göstərmək qabiliyyətləri var. Mənə elə gəlir ki, bu cütlüyün ifası ilə Azərbaycanın qalib olmaq şansı çoxdur".