Müğənni Nadir Qafarzadə “Nömrə-1” realiti-şousundan uzaqlaşdırılıb. Layihənin aparıcısı Emin Musəvi N.Qafarzadənin layihədən uzaqlaşdırılmasının səbəbini növbəti verilişdə açıqlayacağını bildirsə də bu haqda heç nə deməyib. Müğənni isə layihədən özü uzaqlaşdığını deyib: ”Belə bir layihədə iştirak etməyi lazım bilmədim. Onu da deyim ki, layihədən ayrılmağımın iştirakçılarla əlaqəsi yoxdur”.

N.Qafarzadə efirdə az görünməyinin səbəbini toylarının çoxluğu ilə əlaqələndirib.
APA-nın yaydığı məlumata görə isə N.Qafarzadənin Azərbaycan teleməkanında görünməsinə bir müddət qadağa qoyulub. Məhz bu səbəbdən o, “Nömrə-1”dən uzaqlaşdırılıb: “Bunun səbəbi isə onun digər müğənnilərlə birgə Xocalı soyqırımının ildönümündə İsraildə konsert verməsidir”.
Yeri gəlmişkən, N.Qafarzadə həyat yoldaşından da ayrılır. Müğənninin “ANS-press”ə verdiyi məlumata görə, buna səbəb onun “Sarı” jurnalında Səbirə adlı müğənni ilə dərc edilən açıq-saçıq şəkilləri olub. Bu hadisədən sonra müğənninin həyat yoldaşı ilə ailə münaqişəsi yaranıb və həyat yoldaşı məhkəməyə müracəit edərək boşanacağını bildirib. N.Qafarzadənin dediyinə görə, həmin vaxtdan həyat yoldaşı ilə küsülüdür.
Qeyd edək ki, bu dəfə “Nömrə-1”də rinqə İzzət Bağırovla Lalə Məmmədova çıxmışdı. İzzət səs çoxluğu ilə Laləni oyundan çıxardı. Növbəti rinqə isə Teymur Əmrah Xəyyam Nisanovu çağırdı. Xəyyam artıq üçüncü dəfədir rinqə çağırılır.