“Eurovision-2008" mahnı müsabiqəsində Azərbaycanı təmsil edən Elnur Hüseynovla Samir Cavadzadənin çıxışı mütəxəssislərin fikrincə, yüksək səviyyədə olub. Lakin azərbaycanlı təmsilçilərin bu müsabiqədə 8-ci yer tutmasını bəzi həmyerlilərimiz qənaətbəxş hesab etsə də, əksəriyyət bu məqamla razılaşmır.
Xarici İşlər Nazirliyinin mətbuat katibi Xəzər İbrahim “Azadlıq” radiosuna açıqlamasında Azərbaycanın Avropada dostu sayılan ölkələrin bu müsabiqədəki mövqeyindən narazılıq edib. Onun fikrincə, Azərbaycanın dostları sayılan ölkələrin yanlış mövqelərinə vətəndaşlarımız reaksiya verməlidir: “Bir neçə ay əvvəl Azərbaycanın işğal olunmuş ərazilərindəki vəziyyətlə bağlı qətnamənin səsverməsi zamanı da ümidlər özünü doğrultmamışdı. Amma o rəsmi mövqe idi və biz buna münasibətimizi bildirmişdik. Bu isə Avropa vətəndaşlarının mövqeyidir. Hamımız gələcəkdə fəal olmalıyıq ki, potensialımıza və reputasiyamıza uyğun cavab alaq”.
Məsələ ilə əlaqədar “Azadlıq”a müsahibə verən müsabiqədə ifa olunan “Day after day” mahnısının bəstəkarı Gövhər Həsənzadə də Elnurla Samirin 8-ci yer tutmalarından çox məyus olduqlarını bildirib: “Onların ikisi də çox gəncdir, bu proses onlar üçün ağır idi. Dünən (mayın 24-də- red.) uşaqlar çox məyus idilər, səhərə kimi yatmayıblar...”
Bəstəkarın fikrincə, təmsilçilərimiz kompozisiya baxımından beşlikdə də ola bilərdi, üçlükdə də: “Çünki bütün iştirakçılar, hətta yarımfinala çıxmayanlar da bu qənaətdə idilər. Amma onu da başa düşmək lazımdır ki, Azərbaycan birinci dəfə idi ”Eurovision"da iştirak edirdi".
Gövhər Həsənzadə “Eurovision”da iştirakı yaradıcılığında ən böyük imtahan hesab etdiyini deyib: “Ömrüm boyu bu qədər əziyyət çəkməmişdim”.
Milli Məclisin mədəniyyət məsələləri daimi komissiyasının sədri Nizami Cəfərov isə ANS-pressə bildirib ki, “Azərbaycan təmsilçilərinin ”Avrovision-2008" mahnı yarışmasında 8-ci yeri tutması böyük nailiyyət olsa da, iştirakçılar bundan da yüksək yerə layiq olub: “Amma bilirsiniz ki, “Eurovision" müəyyən siyasi müsabiqədir. Burada müəyyən qədər də beynəlxalq səviyyədə bizim millətə olan münasibət aydınlaşır. Məni ermənilərin bir az önə çıxması narahat etdi. Amma bu da elə bir şey deyil".
N.Cəfərovun fikrincə, müsabiqəyə qatılan təmsilçilərimiz öz sənətlərini, istedadlarını tam cəsarətlə nümayiş etdiriblər.