FİFA dünya yığmalarının oktyabr ayı üçün reytinq cədvəlini açıqlayıb. Lent.az-ın məlumatına görə, Azərbaycan milli komandası ötən ayla müqayisədə 14 pillə irəliləyib.

2010-cu il dünya çempionatının seçmə qrup mərhələsinin son qarşılaşmalarında Lixtenşteyn üzərində 2:0 hesablı qələbə qazanan millimiz Bakıda Rusiya ilə heç-heçə edib – 1:1. Bu nəticələr yığmamızın reytinqdəki mövqeyinə müsbət təsir göstərib. Hazırda 213 xala malik komandamız Botsvana ilə birgə 124-cü pillədə qərarlaşıb.

Seçmə mərhələdə yığmamızın rəqiblərindən 1 pillə geriləyən Almaniya 1161 xalla 5-ci pilləyə, 6 pillə geriləyən Rusiya isə 982 xalla 14-cü pilləyə enib. 4 pillə irəliləyən Finlandiya 606 xalla 57-ci, 11 pillə geriləyən Uels isə 418 xalla 78-ci sırada qərarlaşıb. 139 xala malik Lixtenşteyn isə 8 pillə irəliləyib və hazırda 143-cü pillədədir.

Cədvəlin ilk pillələrində dəyişiklik baş verməyib. Əvvəlki kimi ilk üç pilləni müvafiq olaraq, Braziliya (1632 xal), İspaniya (1629 xal) və Hollandiya (1340 xal) tutur. Türkiyə isə 12 pillə geriləyib. Hazırda “ay-ulduzlular” 737 xalla 39-cu pillədədir.